[Object]
Home » » Ulaon Manuruk Manang Marmasuk Jabu

Ulaon Manuruk Manang Marmasuk Jabu


Zaman sonari on nunga hira disarupahon be ulaon na mambongoti jabu dohot manuruk jabu. Sasintongna asing do nian lapatan ni ulaon i, umbalga do ulaon mambongoti jabu  sian na manuruk jabu.
Molo manuruk jabu zaman sonari on didok ma i Partangiangan , hasahatan ni tudu-tudu ni sipanganon dipasahat ma i tu Hula-hula, alai molo ulaon mambongoti jabu do goarna somalna dipasahat ma i tu Tulang.
Ulaon manuruk jabu, boi do sada keluarga mangulahon on jala boi do manang na piga hali, lapatanna molo dipukka muse jabu na baru manang dituhor muse jabuna, somalna dibaen do muse ulaon manuruk jabu molo on do na laho siinganan na muse. 
Alai molo ulaon mambongoti jabu do goarna, holan sahali do boi baenon on, jala gabe jabu parsaktian do on di sude keluarga na. Jala tokka do on jualon alana on na ma jabu sahat tu na sarimatua manang na saurmatua.

ULAON NA MANURUK JABU
Di ari na uli di bulan na denggan, di partangkok ni mata ni ari, mangarade ma suhut paimahon hula-hula dohot odoran na,  jala nunga diparade nasida hian angka sipanganon tu ulaon i dohot sipanganon. Songon i sian horong ni hula-hula, nunga diparade nasida hian angka siboanonna tu jabu ni pamoruonna, ima dekke sitio-tio dohot boras si pir ni tondi.

MANJALO HARORO NI HULA HULA
Mangarade ma suhut dohot haha anggina suang songoni nang dongan sahuta jala jong-jong ma di jolo ni pintu i di na manjakkon haroro ni hula-hula i.
Masuk ma hula-hula tu jabu jala dibahen hula-hula ma parbue na pir  di simanjujung ni hela dohot boruna di pintu masuk i.
jala didok ma :
On ma upa-upa gabe, upa-upa horas. Pirma tondi muna jala horas-horas hamu mangingani jabu sibaganding tua mu na on. Jala tong-tong ma hamu didongani Debata.

PASAHAT TUDU TUDU NI SIPANGANON
Molo Manuruk Jabu do goarni ulaon i, Hula-hula ma hasahatan ni tudu-tudu sipanganon. Alai molo Mambongoti Jabu do  goarni ulaon  tu Tulang ma hasahatanna ( tulang ni amanta suhut ).
Hira songonon ma hata tudu-tudu ni sipanganon on :
Di ari nauli di bulan nadenggan on, hupasahat hami ma tu hamu Rajanami (hula-hula) tudu-tudu ni sipanganon on, tudu-tudu ni panggabean parhorasan ma on, molo tung songon on pe na boi tarpatupa hami laho pasangaphon hamu, las ma rohamu di si Rajanami. Jala songon hata ni natua-tua ma dohonon nami :
Huta si tao tao parasaran ni leang-leang,
horas ma di hamu Rajanami di na manjalo,
Horas ma di hami borumu na pasahathon.
Botima.


PASAHAT DEKKE SITIO TIO
Dung i dipasahat hula-hula ma muse dekke tu pamoruonna i. jala tarsongonon ma hata na :
Di son hupasahat hami ma tu hamu dekke sitio-tio, sai tu tiona ma ngolu-ngolu di hamu. Dekke sahat, dekke na ganjang ma on, asa sahat ma angka nauli nadenggan jala ganjang ma umur-muna. Jala dekke simudur-udur ma on, asa sai mudur-udur ma hamu tongtong rap tu dolok tu toruan mangalului angka pansamotan jala ditumpak asi dohot holong ni Tuhanta.

Hata Pasahat Ulos
songonon ma hata na :
Nuaeng pe hupasahat ma ulos na ganjang on. Parhitean ma on, sai dilehon Debata ma ganjang ni umur di hamu di na manuruk bagasmuna on. Hatubuan ni anak dohot  boru ma jabu sibaganding tua on di hamu.
Asa songon hata ni umpasa ma tutu dohonon nami :
Andor ras ma tu andor ris, tubu di Dolok Purbatua,
Sai horas-horas ma hamu mangingani bagasmuna on, ditumpak i amanta Debata.

Tubu ma simarlasuma di Dolok ni Lobutua
Sai ganjang ma antong umurmu mangingani sibaganding tua on, sahat hamu tu na saur matua.

Sahat-sahat ni solu sahat tu Tigaras,
Sahat leleng hamu mangolu, gabe jala horas.
Botima
Dung simpul napasahat ulos, diparade ma sipanganon jala martagiangma ( tangiang mangan )

MARSIPANGANON
Tangiang marsipanganon sian hasuhuton (parsinabung)
manghatahon dai sira ni sipanganon :
Sitiktik marsigompa, golang-golang pangarahutna
Otik so sadia pe napinatupa ni hasuhuton, sai godangma pinasuna

Somalna tingki marsipanganon boi ma boru maneati ate-ate, jantung, usus dohot aliang-aling sian tudu tudu ni sipanganon i laos huhut dibagihon tu akka namangan i..

MARBAGI JAMBAR
Dung sidung marsipanganon sungkunon ni hula-hula  ma boa do partording ni tudu-tudu ni sipanganon naung di pasahat tu nasida.
Taringot tu parjambaron, sai jumolo do suhut (parsinabung) parsangaphon hula-hulana didok, Ba nunga hupasahat hami tu hamu Rajanami, hamu ma namangaturhon. Namangulahon ma hami”. Molo songon i, pintor olo do sipata didok hula-hula i songon on: “Sidapot solup ma hami. Di boto hami do, di antusi hamu do ruhut-ruhut ni parjambaron.

Namarngingi parsiamun : Hula-hula
Osang parsiamun : Pariban (boruni hula-hula)
Osang parhambirang : Sude boru
Soit : Sihal-sihal (termasuk dongan sahuta)
Ihur-ihur : Hasuhoton(suhut dohot dongan tubu)

MARHATA SIGABE-GABE
Dung sidung marbagi parjambaron udutan ma dohot ulaon na mangihut muse i ma angka panghataion. Molo tung boi sai jumolo ma sian dongan tubu ni hasuhuton manungkun sintuhu ni ulaon, sintuhu ni indahan masak tu hasuhuton.

Jolo mardos roha ma jolo Haha doli  dohot Anggi doli  dohot Dongan Sahuta ise na gabe panise. Somalna molo di ulaon sisongon on dongan tubu do panise.
Di hasuhuton pe nunga marsiaturan ise na mangalusi sungkun-sungkun ni dongan tubu,

Hata sian dongan tubu ;

Gokhon sipaimaon jou-jou si alusan, nunga hujalo hami gokhon dohot jou-jou mu jala nunga ro hami antong jala sahat tu bagasta namarampang namarjual on jala nunga hundul hami antong di amak tiar ba sai tiar ma panggabean parhorasan tu hita tu joloan on bahenon ni Amanta Debata Pardenggan Basa i. Ba nunga bosur hami mangan indahan na las, minum aek sitio-tio, sagat mar lompan juhut huhut sombu minum tuak tangkasan, ba nuaeng pe anggi doli na manungkun ma hami di hata dohot lapatan ni sipanganon i :
Sai marangkup do inna nauli, na dengggani sai mardongan
Siangkup ni nauli dia ma dia ma nanaeng sitaringotan
Botima.


Parsinabung ( hasuhuton )
Tutu do  na nidok muna i, sai marangkup do nauli, mardongan na denggan. Jadi paboan ma tutu nuaeng siangkupna songon na hundul, sidonganna songon na mardalan. Adong do umpasa na mandok:

Mardangka bulung bira, Martampuk bulun tabu,
Sonang ma roha niba, Molo tipak iba marjabu.

Ima namanggohi rohani .....( hasuhuton) on na salelengon gabe marhoi-hoi ibana anggiat dapot namanggohi rohana. Ba hinorhon ni pasu-pasu ni Tuhanta antong, ba;

Tolap do ibana sian Sibuluan, mardalan tu Tampahan
Dapotsa do naniluluan, jumpang na do na jinalahan.

I ma dalannna umbahen na hundul hita nuaeng di jabu na pinauli na on, jala nunga di ingani nasida bagas on. Namarningot ma hami di hata sipaingot namandok;

Labu pe labui, dang asal suanhononhon
Jabu pe jabui, ndang asal inganannonhon

Ido alana umbahen na jinou hamu angka dongan sabutuha, hula-hula, boru, bere, dongan sahuta rodi angka ale-ale, asa rap hita antong martangiang tu Amanta Debata asa gabe jabu na marsahala on, jala sai horas jala hipas sude keluarga mangingani jabu on.
Botima.


Dongan tubu
Ba ianggo ido hape lapatan ni parpunguanta on na uli ma i tutu jala na denggan. Toho do i tutu na nidok muna i, naeng ma jabu na marsahala bagas on. Jabu sipabereng-bereng on jala jabu hinalomoan ni angka dongan sahuta dohot angka sisolhot ma jabunta on. Sai dapot ma antong songon ni dok ni umpasa ;

Mabaor aek puli sian tano ni simamora
Hot ma jabunta on bagas nauli, Inganan marlas ni roha

On pe anggidoli sai manumpak ma Amanta Pardenggan Basa i sai di ramoti ma tongtong jabunta on, sai hotma bagasta on di batuna, togu di rangsangrangsang na jala momos di pangarahutna.

Marbulung ia tandiang, Marboras ia singkoru
Sai gok ma jolma di ginjang, Gok nang mas di si dabu-dabu.
Botima.

Di hita na marhaha maranggi, borunami dohot bere, suang songoni nang dongan sahuta nami , tarlumobi ma di hamu Hula-hula nami , nunga tangkas rap umbegesa hita partording ni ulaonta di sadarion on, jala na tong-tong dope nasida mangido tangiang sian hita naung ro mangadopi ulaon on, asa marsiaturan mahita. Inna roha nean songonon ma partordingna :

1. Mandok hata ma Hita namardongan tubu.
2. Mandok hata ma Boru nami, dohot Bere/Ibebere.
3. Mandok hata ma dongan sahundulan nami Raja ni Dongan Sahuta.
4. Dung sidung dongan sahuta, pasahathon nami ma partingkian tu Hula hula.
    Jala laos hula hula ma, paampuhon tu hasuhuton.
5. Mangampu ma hasuhuton

Boha di hita namardongan tubu suang songoni nang dongan sahuta tarlumobi Hula-hula  nga denggan i didok rohamu ? (Biasana dialusi ma nga denggan be i).

Note:
Dang jadi pangampu Dongan Sahuta, ai Raja do nasida jala na niontang do nasida. Artina digokhon pe nasida asa dohot do martangiang tu Amanta Debata asa di pasu-pasu hasuhuton.
Dung ris horong ni hula-hula mandok hata biasana di paampuhonma tu hasuhuton, dohononna ma: Nunga liat hami pasahat hata nauli hata nadenggan, asa ampu hamu martonga ni jabu.

Parsinabung
Mauliate ma tutu Raja nami,
Songon i ma nang di hita, ala tingkina nama hita mangampu hata nauli hata nadenggan naung dipasahat tu hita, asa mangarade ma hita.

Suman tu aek natio do hamu, riong-riong di pinggan pasu,
Hula-hula nabasa do hamu, na girgir mamasu-masu.

Tinapu bulung nisabi, baen lompan ni pangula
Sahat ma pasu-pasu na nilehon muna i tu hami,
Sai horas ma nang hamu hula-hula.

Aek marjullak-jullak sian tonga-tonga ni batu
Jullak-jullak na i bahenon tu tabu-tabu laho boanon tu jabu
Hata-nauli hata pasu-pasu marhite tangiangmu namanghaholongi hami
Tarlumobi ma i sian Hula-hula nami ampuon nami ma antong
martonga ni jabu, botima.

PASAHAT PISO PISO DOHOT PARSITUAK NATONGGI
Andorang so mangampu, jolo dipasahat ma Piso piso dohot parsituak na tonggi tu hula hula.

MANGAMPU MA HASUHUTON
· parjolo ma boru, jongjong ma sude boru.
· paidua ni suhut, jongjong ma sude.
· Suhut sihabolonan.


Hata pangampui on
Dihamu haha anggi, boru nami suang songoni nang raja ni dongan sahuta, mauliate ma hupasahat hami di harentaon ni roha mu mangadopi gokhon dohot jou-jou nami, suang songoni di akka nadenggan na binaen mu , sai Tuhanta ma nambalos sude na i, asa songon nidok ni umpasa ma dohonon:

Tampulan sibaganding di dolok ni pangiringan
Horas ma hita namarhaha maranggi, marsipairing-iringan.

Tu hamu Hula-hula nami,
Mauliate di sude nauli nadenggan naung pinasahat mu tu hami.
tangkas do hu pangkilalahon hami, burjumu marboru,
dipasahat hamu dengke simudur-udur, dengke sitio-tio, dengke sahat
dipasahat hamu ulos holong ulos si ganjang rambu.
Anggiat ma antong asi roha ni Tuhanta sahat ma tu hami pamoruonmu songon pasu-pasu naung pinasahatmu marhite tangiang dohot elek-elek tu Tuhanta Debata.

Molong tung mardomu sirang pe hita pe annon sian bagas on, tangiang nami di hamu Hula-hulanami sai di dongani Tuhanta ma hamu sahat tu bagasmu ganup marsada-sada. Asa songon ni dok ni umapasa m a dohonon:
Tinapu bulung nisabi, baen lompan ni pangula
Sahat ma pasu-pasu na nilehon muna i tu hami,
Sai horas ma nang hamu hula-hula.

Tarsingot tu Hata nauli hata nadenggan naung pinasahat mu,
Abing ma i antong di abingan nami, Tuak di abara nami, Jala hot ma i antong disimanjujung nami,
Asa songon ni dok ni umpasa ma antong dohonon nami:

Songgop si ruba-ruba tu dakka ni hapadan,
angka pasu-pasu na ni lehon muna,
sai dijangkon tondi ma dohot badan.

Mardakka Jabi-jabi, marbulung ia si tulan
angka pasu-pasu na pinasahat muna,
sai sude mai dipasaut Tuhan.

Naung sapulu pitu, jumadi sapulu ualu,
angka pasu-pasu pinasat muna hula-hula nami,
diampu hami ma di tonga jabu.
Botima.

Di tutup hula-hula ma dohot tangiang.


............  Horas ma di hita  ...............



sumber :

Thanks for reading & sharing Sihaloho Sidapitu

0 komentar:

Post a Comment