[Object]
Home » » Acara Marhata Sinamot

Acara Marhata Sinamot

Ulaon marhata sinamot
=    Pasahat Tudu-tudu ni Sipanganon

=    Paranak pasahat Tudu-tudu ni Sipanganon tu Parboru

=    Parboru pasahat Dekke tu Paranak

=    Tangiang Mangan huhut huhuasi ni sipanganon

=    Mangan  

=    Marhata bagi Jambar

=    Marhata Sinamot

=    Marhatata si Gabe-gabe / manauri

=    Padalan ingot ingot  


MARHATA BAGI JAMBAR


Parhata ni parboru :

Hamu Parboruon nami, beha nunga rade hamu? Asa manghatai hita.


Parhata ni paranak :

Mauliate Rajanami, andorang so hualusi, mangido tingki ma jo hami, asa marsipasangapan jolo hami.

@ Hita na mardongan tubu marsiaturan ma hita, jala ajari jala dukung hamu ahu di na laho mangkatai hita.

@ Hamu boru dohot bere/ibebere, tinggil ma hamu manangi-nangi, asa malo jala hona alusmuna annon.

@ Suang songoni Dongan Sahuta, tuturi hamu hami, ai hamu do umboto sulangat dohot garung ni Suhut.

@ Tarlumobi na huparsangapi hami, Hula-hula____dohot horongna, dohot Tulang____unang bobonoson hamu paihut-ihut hami, ajari hamu hami asa tingkos, tiroi jala tuturi hamu hami molo beda pandapot.

Ompu Nibisuk Sabungan ni roha,

Hula-hula do sungkunon di bisuk, jala si dodo roha

@ On pe di hamu Rajanami, alusan nami ma sungkun-sungkunmunai, Nungnga rade hami Rajanami, botima.


Parhata ni parboru :

Mauliate Raja ni boru !

Andorang so manghatai hita, beha do taringot tu tudu-tudu ni sipanganon, parjolo ma tahatai partording ni parjambaron, Botima.


Parhata ni paranak :

Mauliate Raja nami, toho do i.

Andorang so diseat raut jolo diseat hata, parjolo ma tutu tapahantus Parjambaran dohot Hasahatanna, molo tung adong jambar taripar tu hami, hamu ma mangatur Rajanami, songon dia adatta di huta on
sidapot solup ma hami  mauliate.


Parhata ni parboru :

Mauliate ma Amangboru, parjolo tahatai parjambaran, jala hami ma mangatur , jala songonon ma partording ni parjambaran sesuai dohot naung dikonsep hami.

@ Jambar di Hami (Parboru) ima :  ihur-ihur, 2 Soit, Na-marngingi siamun, ½ osang, ½ Somba-somba/Aliang-aliang dohot Pohu/tanggo-tanggo.

@ Jambar Taripar tu hamu (Paranak) ima : 2 Soit, Na-marngingi hambirang, ½ Osang, ½ Aliang-aliang dohot pohu/tango-tanggo dst.

Tar songoni ma konsep nami, dos ma roha Amangboru?


Parhata ni paranak :

Mauliate Rajanami, nauli jala na denggan mai Rajanami.


Parhata ni parboru :

Hamu Boru nami, hindat hamu ma tu dapur, togihon hamu boru ni Parboruon . . . . . . mangurupi, bagi hamu ma hombar tu adatta, baen hamu ma napatut jambar taripar tu Paranak.



MARHATA SINAMOT


Parhata ni parboru :

Mangkatai ma hita Amang Raja ni Parboruon! Sai jolo ni nangnang do ninna asa ni nungnung, sai jolo pinangan do, asa sinungkun
nunga hupangan hami antong sipanganon na binoan mu nai, Jagar do jala nunga bosur hami mangan indahan  na las, jagar sagat marlompan juhut na tabo huhut sombu  minum aek sitio-tio, sai tu tiona ma angka pansamotan parsaulian dihita,

Dia ma nuaeng langkatna, dia ma unokna

Dia ma hatana, dia ma nidokna

Dokkon hamu ma Amangboru.


Parhata ni paranak :

Gabe ma jala horas,  Rajanami.

Taringot tu sipanganon i,

Si Titti ma si hompa, golang-golang pangarahutna, tung so sadia pe na hupatupa hami, Sai pamurnas mai tu daging, saudara tu bohi, sipalambok pusu-pusu ma i, Sipasindak panaili, sai godang ma pinasuna.

Sai manumpak ma tondimuna Rajanami, marhite-hite tangiangmuna di hami Parboruonmuna, sai lam tamba ma sinadongan di hami, asa tarpatupa hami dope  na tumabo na laho pasangaphon hamu hula-hula nami.

Jadi ianggo lapatan ni sipanganon i, Rajanami,  Parhorasan Panggabean do, botima Rajanami !


Parhata ni parboru :

Gabe ma tutu jala horas Raja ni Parboruon nami!.

Sai sahat ma hata nauli hata na denggan songon na nidokmuna i, tumpahon ni Amanta Debata, sai dapot ma nian songon hata ni umpasa :

Bona ni aek Puli, di dolok ni Sitapongan

Sai tubu ma di hamu angka nauli, jala sai lam tamba Pansamotan.

Alai di hamu Amang Raja parboruan nami, sai marangkup do na uli, sai mardongan do na denggan. Jadi tung tangkas ma paboa laengku hinaroromuna tu bagasta on.

Ranting ni bulu duri, jait masi-jaotan,

Siangkup ni hata na uli, dia ma nuaeng si-taringotan.

Botima Raja parboruan nami!


Parhata ni paranak :

Olo Rajanami, toho do na nidokmuna i, Sai marangkup do na uli, sai mardongan do na denggan, Nuaeng pe paboaon ma tutu, siangkupna songon na hundul, sidonganna songon na mardalan.

Jumolo ma hami Raja nami marsomba ujung dohot jari-jari sampulu tu hamuna pasappulusada simanjujung. Mauliate godang dohonon nami tu hamu hula-hulanami, na ria manjangkon hami di bagasta na marsangap na martua on.

Taringot diharoronami Rajanami,  na adong do na solot di ate-ate nami, jala gompang di pusu-pusu nami, na naeng sombahonon nami tu hamu Raja nami, Alai tung molo adong annon hata na hurang manang na lobi, anju hamu hami Rajanami.

Ampapaga dolok tu ampapaga humbang

hita do marsogot, laos hita do nang haduan


Jadi songon on do Rajanami, Na ro do alu-alu ni anak nami  tu hami songon on : Diluahon patna ibana ninna, tu hutanta na uli on, huhut ma huroha jinou-jou huhut hiniap-hiap ni rupa na uli dohot parulaon na denggan ni boru ni na gabe, boru ni na mauli-bulung hula-hulanami di huta on. Longang do rohanami umbege hatana, ai ianggo rohanami, nda tung leak adong boru ni halak na olo pangkulinganna. Hape Rajanami, didok ibana ma tu hami, disi mulak ibana sian huta on, jolma na martua do ibana, alana :

Pitu lili na, pa ualu jugian na,

Na uli do  nipi na, ai dijangkon borumu, ibana.


las roha antong huhut malambok pusu umbege i songon nidok ni umpasa:

Tinampu bulung si-arum, bahen uram ni pora-pora

Na hansit gabe malum, molo dapot sinangkap ni roha

Nuaeng pe Rajanami, nunga dipasiat boru muna  anak nami, ba tung asi ma roha muna Rajanami,  jangkon hamu ma anak nami i gabe anakmuna, nian ianggo sian sibahenon do Raja nami ndada na barani hami mandapothon hamu, ala ni hapogoson, ai tung so adong do na boi pangasahonon nami.

Alai nang pe songoni Rajanami, ianggo somba ni uhum do, sai na bahenon nami do  olat ni na tarpatupa hami, jala pos do roha nami di hamu,  ndada ampehonon muna tu hami na so tarusung hami.

Angkup ni i, naung boru muna hian do hami, jadi ndada huling-huling ni langkophon be hami tu hamu manang imbulu sinuanhon.  Songon i ma hata nami Rajanami, botima.


Parhata ni parboru :

Mauleate Raja ni Parboruoan, las do rohanami umbege hatamuna i. Hami pe antong dipangido rohanami do, asa domu na marrongkap. Jadi taringot di bere nami,  nunga na ulinon i, On pe lae, sai rongkap ni borunami ma bere i, rongkap na gabe, rongkap na mamora, rongkap na saurmatua. Ianggo taringot di siboanon muna lae, laho palashon rohanami, on do dohonon nami tutu :

Ndang tuktuhan batu, Dakdahan Simbora,

Ndang tuturan Datu, Ajaran na Marroha.


Na malo do hamu, sigodang boto-botoan,

Raja na bisuk do hamu, Ompu ni Parbinotoan.

Jadi nang didok hamu na so adong be di hamu, bangko ni hata do i sidohonon. Tangkas do tinanda hamu, jala tutu do na nidokmuna i, boru nami hian do hamu, jadi binoto do ndada na paidua hamu di sinadongan,

Pat ni Gaja tu pat ni Hora,
Anak ni Raja do hamu, Pahompu ni Namora.

Asa hami pe Lae, suang do dohonon nami songon nidok ni bere i :

Pitu lili nami, paualuhon jugian

Uli do nipi nami,ai gohanmuna ma hajutnami.

On pe lae, Raja ni parboruon, Torop ma parade hamu angka dorbia i dohot sihumisik i, asa saur patupaon ni suhut nami tu pesta i, botima, Raja niboru!


Parhata ni paranak :

Mauliate Rajanami, Raja ni hula-hula! marsomba ujung hami, marsomba huhuasi, tutu do Rajanami, ianggo ala sangapmu na dohot balga ni partubumu na, patut do hamu manjalo angka na ginoaranmu na i. Jala tutu do nang na nidokmu na taringot tu hamoraon ni Ompunta na jolo, alai habis do i sudena laho pasingkolahon beremu na. Tung adong pe pasipasina nuaeng, ndada na tarhatahon be i, ai mampar do nuaeng sude i di Padang Bolak. Alai ala huboto hami ndada pola gulut di sinamot hamu hula-hulanami. Ido Raja nami, umbahen na barani hami mandapothon hamu. On pe Raja nami, sai unang paurak hamu hami di pogos nami on. Nunga jolo I huroha pangidoan ni sibaran, ai :

Sai tu ginjang ninna porda, sai tu toru do pambarbaran

Sai naeng mamora ninna roha, hape ingkos pogos do ninna sibaran.


Ai hami pe nian Rajanami, sai naeng do nian mangalehon na godang, asa sangap iba berengon ni dongan, ai sangap do na nialap, sangap na tinaruhon songon Silindung na uli. Alai hansit do tangan mandanggurhon na soada.

On pe Rajanami, tung padauk hamu ma sian i. Buhul hamu ma siboanon nami, alai ingot hamu Raja nami hata ni umpasa:

Madek-dek asso soit, tongon tu tarumbara

Unang dok hamu hami parholit, silehonon do na soada

Botima Rajanami!


Parhata ni parboru :

Tangihon hamu ma, asa diboto hamu jadi pasahat hamu ma godang ni Sinamot (...  rp  ...) Botima!


Parhata ni paranak :

Rajanami, pintor tarsonggot do iba dibahen hamu, sian dia ma uhalan na sai godang. Alai hudok pe songon i, torop do dison haha anggi dohot boru nami.

Hamu angka haha doli dohot anggi doli, nunga dibege hamu hata ni hula-hulanta na mangido Sinamot (...  rp  ...) beha pandokta taringot tusi? Haha doli ma jolo mangalusi.


hata sian haha doli ni paranak :

Hamu Rajanami, raja ni hula-hula. Na patut do nian na pinangidomuna i, ai tutu do na mora hian do hami nahinan. Alai anggo nuaeng ndang na tarpangasahon be i, nunga songon ni dok ni umpasa :

Dang tardanggur be na gantung, di dolok ni Sipakpahi,

dang taringot be na dung, songon bongka siapari.


Dang na so malo hami Raja nami mandok na godang, alai dang tarpatupa songon nidok ni umpasa :

Niluluan tandok, hape dapot parindahanan,

Tolap pamangan do nian mandok, alai ndang tuk jamaon ni tangan.


Alai tung beha pe pogos nami Rajanami, sai na bahenon nami do somba ni uhum tu hamu. Nunga digoarhon hamu nakkin godang ni Sinamot. Dohonon nami, na  patut do i nian, alai Rajanami :

Duru ni harangan, hatubuan ni tada-tada,

Hansit do tangan Rajanami, mandanggurhon na soada.


Tung so huboto hami do nuaeng manang tudia luluan sagodang ni na pinangidomu na i. On pe Raja nami, ta orui ma i saotik, jadi tabahen ma (...  rp  ...) Sinamot i. Jala Sitombol ma i. Botima Rajanami!


Parhata ni parboru :

Hamu angka haha anggi Raja ni hula-hula, Raja ni Dongan Sahuta, Ale-ale, angka Pariban dohot angka boru nami, nunga dibege hamu nakkin, hupangido (...  rp  ...) hape holan (...  rp  ...) do ninna nasida. Jadi ta dok be ma pandapotta taringot tu si, ninna rohangku sian Haha doli ma jolo mandok hata tu parboruonta.

Hata sian haha doli ni parboru :

Hamu Raja ni borunami, tung longang do rohangku umbege hatamu na, (...  rp  ...) do hupangido hami, hape tung so alang do rohamuna mandok (...  rp  ...) Aut na so adong di hamu,  dang na  pola dia dohonon. Ai tangkas do binoto, godang do di hamu,

Barita ni lampedang, mardangka bulung bira

Barita ni hamoraonmu, tarbege do ro didia.


Hape pintor dilongsut hamu do sian punsu di dolok Martimbang madabu tu rura ni aek batang toru. Alai on dang na mohop di hepeng hami, alai uli ni lagu muna do huparsinta hami. Jadi dang pola sai gogohonon nami be (...  rp  ...)  ginotap ma i satonga . Jadi bahen hamu ma (...  rp  ...) godang ni Sinamot.

Oloi hamu ma i, Botima!


Parhata ni paranak :

Hamu angka haha anggi, nunga dibege hamu hata ni hulahulanta. Nakkin nunga haha doli mandok hata, jadi nuaeng ba anggi doli ma jolo mandok hata elek-elek muse tu Raja ni hulahulanta.

Hata sian anggi doli ni paranak :

Raja nami, Raja ni hula hula, tung toho do raja nami hatamu na taringot tu pardabu ni pinangidomu na tu na nidok ni haha doli nami. Alai Raja nami, marsomba hami dohot jari-jari sampulu tu sangapmu na. Dang tois manang leas ni roha nami na mambahen hata songon i. Tung ala ni na tarpaksa do hinorhon ni pogos nami, ai beha ma Raja nami so tarsonggot iba umbege na pinangidomuna i. Sian dia ma i alapon, sian dia ma i uhalon. Jadi tung songon pardabu ni batu na dokdok tu aek na bagas pe pangoruan nami di na pinangidomu na i, dang ala ni leas ni rohanami di hamu Raja nami, tongka ma i, tung pogos nami do na mambahen i.  Songon nidok ni umpasa :

Madabu assa-soit, tu toru ni pansa-pansa,

sotung didok hamu hami na tois, hapogoson do na mamaksa.


Alai songon i pe Rajanami, arga do hatamu na di hami, nunga sai dipangido hamu tambana, ba dang juaon nami i,

Mangula ma pangula, di rura Pangaloan

Molo mangido hula hula, dae do so oloan.

Tinambaan ma na nidok ni haha doli nami i gabe (...  rp  ...) asa sai tamba ma parsaulian, tamba panggabean di hita saluhutna.  Botima Rajanami!


Parhata ni parboru :

Hamu angka anggi doli, nunga dibege hamu hata i,  sai songon na mangkolit dope parboruonta on. Jadi nuaeng pe anggi doli ma jolo na mandok hata.


Hata sian anggi doli ni parboru :

Hamu Raja ni Parboruonnami, tung longang do rohangku umbege hata muna i, ai songon panetek ni tuak ni bagot di ari logo do dibahen hamu sian i na manambai. Ai takkas do binoto hamu paradongan,

Anak ni Raja do hamu, pinompar ni namora

Molo manambai hamu, ba naeng ma umpola.

Ingot hamu songon hata ni umpasa :

Sapala na mardalani, unang holan sahat tu Sigalangan

Sapala na manambai, ba unang ma diparalang-alangan.


Alai hami pe dang na so olo padaukkon.  Songon na nidok ni haha doli nami nakkin,ginatap ma i muse. Bahen hamu ma (...  rp  ...)  raja ni boru, oloi hamu ma i. Botima!

Parhata ni paranak :

Hamu Dongan Sahuta nami, nunga dibege hamu angka pangkataion i sai tong dope maol dioloi angka hulalatanta pangidoanta i, Onpe di hamu dongan Sahuta ma jolo mandok hata.

Hata sian dongan sahuta ni paranak :

Mauliate ala diandehon hamu hata i tu hami dongan sahutamu na. On do dohonon nami, sai masipaolo-oloan ma hamu na dua bola pihak jala masipaune-unean, jala unang antong masipaujatan. Ingot hamu ma songon nidok ni umpasa :


Sambil na tartondong, dapotan ampa-paluan
Asa denggan martondong, unang masipa ilaan


Ala sai mangigil dope hamu Raja ni Hulahula sian bariba i, olat ni na tarbahen parboruan muna sai na oloannami do i, songon hata ni umpasa :

Lubuk sigura-gura, denggan do panjalaan,

Molo sai mangigil Hula-hula, olat ni na boi sai tinambaan.

Alai on ma muse dohononnami tu hamu Raja ni Hulahula,


Sinuan bulu, sibahen na las
Sinuan partuturan, sibahen na horas.

Asa parhorasan do di hita na umporlu, dang na sinamot. Asa dapot parhorasan i, taingot  ma poda ni angka ompunta :

Dolok ni pangaloan, hatubuan ni hau toras

Halak na masipa-oloan, i do na saut horas.

On pe Raja ni Hulahula, padauk hamu ma sian i, mangoloi pangidoan nami i. Jadi songon na manonga-nongai di hata i, ba, dohonongku ma, tatambai ma gabe (...  rp  ...) asa gok parsaulian dohot parhorasan, di hita luhutna. Botima!


Parhata ni paranak :

Nunga dibege hamu Raja ni hulahula na nidok ni dongan sahuta nami i. Dang tung so naung ulinon i hata nasida i.

Dang adong be i na rissir, ndang adong be na longa

nunga be i tung sirsir, nunga be i tung hona.

On pe Rajanami, jalo hamu ma  (...  rp  ...)  Botima!


Parhata ni parboru :

Hamu dongan sahutanami, nunga dibege hamu hata ni dongan sahuta ni parboruonta sian bariba an, hamu ma jolo mandok hata. Tung dampor jolo bahen hamu, asa dapot songon na tapangido i.

Hata sian dongan sahuta ni parboru :

Mauliate, gabe ma hita jala horas, hami pe ba dohonon nami do hata saotik. Tutu do songon nidok ni dongan sahuta ni parboruon sian bariba an, ingkon masipaolo-oloan do na martondong jala masipaune-unean. Asa dohonon ma songon nidok ni natua tua :

Aek godang, aek laut

Dos ni roha do sibahen na saut

Angkup ni i,

Sihingkit sinalenggam

sai tapaune-une ma, asa dapot na dumenggan.

On pe, di hamu Parboruon ni dongan sahuta nami on, (....  rp  ....) do nian hupangido hami sian on, hape (....  rp  ....) do didok hamu sian i. Jadi molo hurimangi tung mansai pagodang hu dope salisina, Ninna rohanami nean, ingkon dos do bahenonta tuatna dohot nangkokna di na marsialusan hita. Ima hata sian hami dongan sahuta, Botima.

Parhata ni parboru :

Beha do amang, Raja ni boru, nda tung so naung dauk i da, hata ni dongan sahutanami i. Nda tung so naung dampor i jala tabo tu sipareon, ai

Nunga disi talina, disi rompuna

Nunga disi daina, disi holpuna.

Jadi oloi hamu ma i. Botima.


Parhata ni paranak :

Hamu angka boru nami, nungnga dibege hamu sude dalan ni pangkataion mandok hata i tu hulahulanta, tung malo ma hamu jo mandok hata elek-elek, asa pintor dauk roha ni nasida manjalo.


Hata sian boru ni paranak :

Hamu Raja nami, raja ni hulahula. Aturanna ma i andehonon ni hulahula nami  hata i tu hami ianakkonna,

Durung do tutu boru, tomburan hulahula;

Na ingkon do porsanon ni boru, siporsanon ni hulahula.


Dohot pe hami boru nasida ro tu bagasta na marampang na marjual on, ba na laho mangurupi nasida do. Alai, nunga songon i jolo huroha dalanna, ianggo di tingki on, gabe tarpaksa do ingkon dohonon songon hata ni umpasa :

Ni Durung pora-pora, ala soada be sibahut,

Naeng mangurupi ninna roha, hape soada isi ni hajut.

Alai au, songon boru, tung mansai sangap do di au hulahula, tarlumobi songon hamu hulahula ni hulahula. Alani i tu hulahulangku dison ba dohononku ma pangidoanhu,  tabahen ma Sinamot i gok gabe (....  rp  ....) asa gok parsaulian, gok parhorasan di hita luhutna. Ima hata sian hami boru. Botima!


Parhata ni paranak :

Hamu Raja nami, raja ni Hula-hula, nunga ditambai boru nami gabe (....  rp  ....), tolopan nami do i. Jalo hamu ma i Raja nami! Botima.


Parhata ni parboru :

Hamu angka boru nami, nunga dibege hamu hata ni parboruonta sian bariba an., nuaeng  pe boru nami ma jolo mandok hata.

Hata sian boru ni parboru :

Mauliate,  ala diandehon hamu hata i tu hami Borumu.

Hamu, Raja  . . . . . . ., ala boru ni hula-hulanta on do hami, gabe marampara nama hita, Jadi ampara nama dohonongku tu hamu. Jala anggo tu joloan on, sai saut ma na tahatahon on, alai ianggo di ombas on, ingkon songon nidok ni umpasa dope dohonon,

Masi timbaho ma jolo hita, nang so ada na mardai

Songon na maralo ma jolo hita, nang pe nian so marbadai


Ingkon ihuthonon nami dope hulahulanta sadari on, asa unang tartuktuk, unang tarrobung. Jadi taringot sinamot i Ampara :

Nungnga be takira, nungnga ta bilangi

Nungnga be taida, ba patut ma tatimbangi.

Didok hamu (....  rp  ....) upa suhut, ba pingkiri hamu ma jolo, beha ma panjama ni hula-hulanta disi?

Madabu jarum tu na pot-pot,

dang diida mata alai diida roha.

Laos songon i do nang tu Amparangku. On pe Ampara, manat jolo timbangi hamu, godang ma lehon hamu!. Ai molo iang hulahulanta on, ba sangapmuna do i.  Angkup ni i, songon sada boru naung leleng ahu di hula-hulanta on, boi do paboaonku tu amparangku,  Naburju do hula-hulanta on marboru, dang loason ni hulahulanta on ngalian boruna, pintor  ulosanna do i, ai so diboto nasida mangkolit, songon hata ni umpasa :

Tubu andor ni gadong, jonok tu simarhalosi

Holan sahali pe tu nasida hinunti sipanganon,

nga pitu hali iba diulosi.


On pe Ampara, so tung mangkolit hamu tu hulahulanta on. Jadi dohononku ma, ampara, bahen ma sinamot i boho gabe (....  rp  ....) asa boho ro angka pansamotan dohot parhorasan tu hita tu joloan on. Botima.


Parhata ni paranak :

Olo ampara, tung na uli do nian nidokmi, jala binoto do nian huhut, na mandanggurhon tu dolok do iba, molo mangalehon tu hulahula. Alai songon nidok ni hahadoli nami nakkin, hansit do tangan mandanggurhon na so ada. Alai nidok pe songon i, dison do hulahula nami, nasida ma jolo mandok hata, jala mangihuthon pingkiranku, ba hata ni hulahula nami on ma na songon hata panimpuli sian hami. Botima.


Hata sian hula hula ni paranak :

Mauliate, ala diiandehon hamu hata tu hami Hula-hulamuna. Laos tu hamu Parboruon nami  sandiri jumolo hata dohonon nami. Tutu do songon nidok muna i, hansit do tangan mandanggurhon naso ada. Alai ingot hamu ma poda ni ompunta sijolo-jolo tubu :

Tuat Raja martua, marabit tigabolit

Anggo tu Hulahula, tung so boi do mangkolit.

On pe, sa boi na ingkon oloan do pangidoan ni hulahula. Dang sala nang mangutang iba anggo di tingki na pangolihon anak.

Jala tu hamu Raja i, dohonongku ma, ala nunga rap marboru hita nuaeng tu Parboruonta na dison, ba gabe marampara na ma hita nuaeng. Jadi Ampara, on ma dohonongku tu hamu :

Dang alani gondangna, umbahen na ni eahan

dang alani otikna, umbahen na tinadingkon.

Poda ni ompunta sijolo-jolo tubu :

Amporik mallipik, habang-habang tingki haleon

Na godang do na otik, asal ma ias roha mangalehon


Angkup ni i, songon naung binege muna nangkin hata ni Parboruonta sian on, Hatangkon ma songon panimpuli ni elek-elek nasida.  Jadi sotung dijua Ampara niba be hatangkon. Oloi amparangku ma sinamot (....  rp  ....) Sai sahat ma panggabean, sahat parhorasan di hita luhut.

Dihadengganhon Amparangku ma i :

Bona ni aek puli, di dolok ni Pangaluan

Saut ma hita dapotan uli, ala naung marsipaolo-oloan

Botima, horas ma hita sude!


Parhata ni paranak :

Hamu Raja ni hulahula nami, nunga dibege hamu hata ni hulahula nami na mandokkon Jalo hamu ma Sinamot (....  rp  ....) i. Oloan nami do i antong hata nasida i :

Hudali ni pangula, peak diginjang parapian

Molo tinurut poda ni hulahula, sai na ro ma parsaulian.

Jadi hamu Raja nami, tung so gok pe i nuaeng songon na pinangido muna, naung gok do i, molo dihadenggankon hamu. Tong tong do parutang boru tu hulahulana. Sai manumpak ma tondimuna marhite tangiangmu na jala sai mamasu-masu ma Amanta Debata, sai lam tamba di hami pansamotan, asa adong bahenon nami manubut-nubut roha ni hamu hulahulanami. Jala songon naung nidok nangkin, songon hata panimpuli nama i hata ni hulahula nami i. Jadi denggan ma rohamu Rajanami manjalo i.

Pusuk ni jabi-jabi, tu bulung ni simarlasuna

Tung otik pe na husombahon hami, sai godang ma pinasuna.

Botima Rajanami!


Parahata ni parboru :

Ala nunga dibahen hulahula ni parboruonta sian bariba an na songon hata panimpuli sian nasida, ba hami pe, hupangido hami ma sian hamu hulahula nami, ba hamu ma nang mambahen alus panimpuli sian hita.  Dok hamu ma.

Hata sian hula hula ni parboru :

Hamu Raja ni parboruon ni borunami on. Didok hamu nangkin dang tarbahen hamu mangalehon na godang, ala nunga pogos hamu. Alai anggo dohononku, tung apala pogos muna i ma nian mandorong hamu asa buas hamu mangalehon tu hulahula muna, songon nidok ni umpasa :

Nidurung situma, laos dapot pora-pora

Molo buas iba tu hulahula, na pogos hian iba gabe mamora.


Alai hudok pe songon i, dang na pola hata mangigil be i, ai molo so sala iba, nunga dipatubegehon hulahula muna sian bariba i na songon hata panimpuli muna.


Tu hamu parboruon nami (parboru)  on ma dohonon nami, sude do angka na pamuli boru sai marsintahon asa dapot nian songon hata ni umpasa :

Marasar ma aili, ditarui bulung singkoru

Sai naeng ma nian sihar panaili, hinorhon ni tuhor ni boru.


I ma Alana umbahen na sai godang nian pinangido tuhor ni boru niba. Alai dang sai sinamot na godang mambahen togu ni partondongon. Tupa do sipata ala ni balga ni sinamot gabe godang sipingkirhonon tu pudi, songon nidok ni ompunta sijolo-jolo tubu :

Lam godang ni ula tano, lam godang ma Sipanganon

Lam godang sinamot jinalo, lam godang ma sisarihonon.


Jadi nunga tung dipatedek raja ni parboruonta tu hita parsisiraan nasida jala dipataridahon isi ni roha na, ba hamu pe, boru nami patuduhon hamu ma holong ni roha muna. Ianggo dohononku, ba hadenggankon hamu ma si (....  rp  ....), Jalo hamu ma i.

Onggang marlatang, amporik marlipik

Gabe do partuhor na godang, laos gabe do partuhor na otik.

Botima.


Parhata ni parboru :

(Mangandehon hata tu Suhut Parboru)

Hamu suhut nami, ba nunga dohot hulahula nasida dohot hulahulanta manolopi pangidoan ni parboruonta sian bariba an, ahu sandiri pe nunga huida, ba olat ni i na ma gogo ni parboruonta on. Jadi ninna rohangku, dang pola be sai dat-datan mangido na gumodang, ai :

Pir batu piran do nasoada


Alai dang ahu sibahen putusan, Ho do Ampara, songon ni dok ni umpasa :

Lasiak na rara binahen tu panutuan,

Raja parhata pe au, sai suhut do sibaen putusan

Asa dok ma sian i, Botima.


Hata sian suhut parboru :

Nauli, denggan do na nidok mi. Alai ulahi jolo sahali nari manangkasi parboruonta, manang na olat ni i nama na tarlehon nasida, atik beha na maruba dope roha ni nasida.


Parhata ni parboru :

(Manungkun tu Paranak)

Songon on do Raja ni boru, adong dope pangidoan ni suhut nami sian on. Didok ompunta sijolo-jolo tubu :

Hauma na tardas, dipaullus-ullus alogo

Molo aek na bagas, sai niulak-ulak do ni dodo.


On pe Raja ni boru :

Marbunga ma lasiak, dompak mata ni ari

Atik na maruba dope roha muna, sinungkun jo sahali nari.

Beha boi dope oloan muna manambai saotik nari?

Botima Raja niboru!


Parhata ni paranak :

Raja nami na uli lagu, raja ni hula hula. Marsomba ujung hami tu hamu, marsomba huhuasi. Unang jo hansit roha muna, tung i dope na dapot hami, Botima.


Parhata ni parboru :

(tu suhut parboru)

Nunga dibege hamu, suhut nami, hata ni parboruonta. Ninna rohangku, tajalo ma i.

Hata sian suhut parboru :

Nadenggan ma jala nauli jaloon ma i, paboa ma i tu nasida.


Parhata ni parboru :

Hamu raja ni boru nami, ba nunga uli roha nami manjalo na nidokmuna i, sai gabe ma hita jala horas. Jadi Pasahat hamu ma Bohi ni Sinamot i, jala panggohi pasahat hamu ma di pesta unjuk.


Jadi mangarade ma Suhut Parboru (Inanta boru Suhut Bolon mangarade ma, manarehon ulos tanda naung martondong), jala langsung ma Suhut Paranak pasahathon, holan mamilangi pe ahu. Boan hamu ma tu son.


Parhata ni paranak :

Mauliate Raja nami, gabe ma hita jala horas.

Jadi mangarade ma hamu Suhut laho pasahathon Bohi ni Sinamot i,


Parhata ni parboru :

(Parhata ni parboru mamilangi bohi ni sinamot andorang so dipasahat Suhut Paranak tu Suhut Parboru).

To ho do bohi ni Sinamot i nunga takkas be bilanganna, pasahat hamu ma!.


(Suhut Paranak pasahat bohi ni Sinamot tu Suhut Parboru, dung dijalo, mandok hata ma Suhut Parboru tu Dongan Tubuna :
Ahu pe na manjalo Sinamot on, na rap manjalo ma hita disi.



Parhata ni paranak :

(Dung dipasahat Suhut Paranak Bohi ni Sinamaot tu Suhut Parboru). Mangido tingki hami satongkin tu hamu Raja nami, ala adong do na naeng pasahaton ni Suhut Paranak tu na laho Parumaen nami, disiala holong ni roha nasida tu boru muna na naeng parumaen nami. (Laos dijouhon ma calon parumaen tu jolo laho manjalo holong ni roha ni hasuhuton).


Parhata ni parboru :

Hamu Raja ni boru nami, nunga dijalo hami Bohi ni Sinamot, beha adong dope sipangidoon muna, rade do hami mangalehon. Botima.


Parhata ni paranak :

Adong dope Rajanami, Pangidoan, naeng ma nian sude hami ulosanmu, alai ulos na martohonanma ulos herbang, tarmasuk ma i Ulos Pansamot dohot Ulos Hela.


Parhata ni parboru :

Na uli, rade do hami,  ai lam godang si ulosan, tamba do sangap, jala tu na so dapot ulos herbang, tong do lehonon nami Ulos natinonun sadari, baen hamu ma daftarna.


Parhata ni paranak :

Mauliate Raja nami. Pangidoan nami tu hamu hula hula nami, adong do hubahen hami konsep tu palaksanaan pesta unjuk, ima songon tujuan laho pasangap hamu, hulahula nami jala padipposhon ulaonta, jala songon on ma konsep nami :


Acara Panomu-nomu  di Pesta Unjuk :

1. Masuk ma angka raja na ginokkon, dongan sahuta dohot ale-ale, Pariban dohot angka boru/bere.

2. Parjolo ma di tomu-tomu sian horong nami Paranak, ima : Hulahula dohot Tulang  dohot Tulang Rorobot.

3. Ala di alaman ni Paranak do Pesta, jala asa sangap hamu Hulahula nami dohot uduranmu na, hami ma manomu-nomu hamu jala sauduran ma hamu dohot hulahulanta dohot Tulang dohot Tulang Rorobot dohot sude na patut jadi uduran muna hula hula nami.

4. Angka silua berupa dekke dohot boras si pir ni tondi pasahat hamu ma tu hami, dibahen hami pe daftarna.

5. Prosesi masuk Penganten

Sude raja na ginokkon asa rap jong-jong laho manomu-nomu haroro ni pengantin didampingi suhut Paranak dohot Suhut Parboru, huhut di-iringi musik dohot ende.


Pinggan Panganan :

1. Na pasahathon angka pinggan panganan sian borunami ma ala boru nami do parhobas di pesta i

2. Parjolo ma dipasahat hami pinggan panganan tu hamu horong ni hula hula nami (sesuai daftar)

3. Menyusul ma pasahaton nami pinggan panganan tu angka horang ni hami paranak (sesuai daftar).

I ma Rajanami konsep na hupasahat hami tu hamu hula hula nami, Botima!


Parhata ni parboru :

Nunga denggan be i : Aek godang do aek laut, Dos ni roha do, sibahen na saut.

Botima.


Parhata ni paranak :

Mauliate Raja nami dihalambason ni roha muna tu hami marboru, andorang so masuk hita tu acara Manauri/Hata Sigabe-gabe/Hata pasu-pasu, denggan do dijahahon Dongan Sahuta nami songon butir-butir ni pangkataion disadari on. Tu hamu Dongan Sahuta nami, jahahon hamu ma jolo songon butir-butir ni pangkataionta sadari on :


Hata sian dongan sahuta ni paranak :

Mauliate, hujahahon hami ma songon butir-butir ni pangkataionta disadari on, ima (dijahahon ma sesuai kesepakatan naung diputushon).

1. Godang ni Sinamot

2. Bohi ni Sinamot

3. Sifat ni Pesta  TARUHON JUAL ima  Pesta dialaman ni Paranak

4. SIBUATON ima  Namarmiak-miak/Sigugut ramba

5. Mobil Pengantin  sian Paranak/Parboru

6. ULOS ima  . . .ulos herbang dohot . . . ulos Tinonun sadari.

7. Panandaion godangna : . . . .

8. Torop ni Undangan       . . . (Paranak . . . dohot      Parboru . . . . )

9. Ulaon Sadari: Maningkir Tangga dohot Paulak Une

10. Martumpol  . . . . . . . .

11. Sibuha-buhai . . . . . . . . . . . .

12. Pamasu-masuon . . . . . . . . . .

13. Pesta Unjuk .............................

14. Tudu-tudu Sipanganon tingki Sibuha-buhai, disimpan naeng dipasahat diacara

        maningkir tangga.


Botima.


Parhata ni paranak :

Molo adong na hurang lobi na dijahahon ni dongan sahuta nami i,  patingkos hamu hami Rajanami, Botima.


Parhata ni parboru :

Mauliate, nunga dimpos be saluhutna, Botima.



ACARA MANAURI


Parhata ni parboru :

Masuk ma hita tu acara terakhir, ima Acara MANAURI/Hata Sigabe-gabe/Hata Pasu-pasu.


Molo satolop hita, ala marningot tingki, songon on ma nian :

1. Sahalak ma sian horong ni Hula-hula, sahalak ma Dongan Tubu.

2. Taripar ma tu Paranak, tong ma laos songon i.


Parhata ni paranak :

Nauli jala denggan ma i Raja nami.


A. Sian PARBORU

1. Hula-hula  (Tulang ni Boru Oroan)

Gabe ma hita jala horas, tadok mauliate tu Amanta Debata na mandongani hita sadarion. Nunga marsipaunduhan hamu jala marsipaoloan di angka nanaeng patupaon muna. Sisada uli nama hamu na dua hasuhuton di ulaon on, jala sisada gora.

Dibahen i, sai masiamin-aminan ma hamu di ulaon on, songon lampak ni gaol, jala masitungkol-tongkolan songon suhat di robean.


Taringot anak dohot boru na tahatai sadaarion, ba on ma dohonongku, ba sai marrongkap ma nasida.

Balintang ma pagabe, tumandangkon sitadoan

Ari muna ma gabe, ala nunga hamu masipaolo-oloan.


2. Mangampu SUHUT PARBORU

Mauliate tadok tu Tuhanta, ala denggan mardalan ulaonta dibagasan sadari on.

Mauliate nang tu Dongan Tubu, Boru, Bere, Dongan Sahuta, lumobi Hula-hula . . . . . dohot Tulang . . . . ., Tuhanta ma na mambaloshon marlipat ganda dihamu, Na hurang lobi panjalo nami manganju ma hamu.

Tu Borunami . . . . . ., rap dohot uduranna, Rap martangiang ma hita Lae, Ito, Amangboru, Anggiat sude na tahatai i, dipasu-pasu Tuhanta. Di namulak pe hamu, Tuhanta ma na mandongani dipardalanan, hipas sahat tu tujuan.

              Horas ma dihita sude!


B. Sian PARANAK

1. Hula-hula

Andoras ma andoris, andor ni Sipora-pora

Sai horas ma hita torkis, Maduma jala mamora.

(Boi do ndang pola mandok hata sian hula-hula Paranak, cukup ma suhut paranak)


2. Mangampu SUHUT PARANAK

Mauliate di Tuhanta, renta jala une ulaonta dibagasan dame dohot las ni roha, sudena  i dang alani gogonta, holan asi dohot basa ni Tuhan i do.

Mauliate ma pasahatonku tu sude Dongan Tubu, Boru dohot Bere, Dongan Sahuta dohot Ale-ale, tarlumobi Hula-hula nami . . . . . dohot Tulang . . . . . . . , sai Tuhanta ma mandongani hita saluhutna.

Tu Rajanami . . . . . . rap dohot uduranna, mauliate ma dipanjalo muna, Lambok jala minar, hata nauli, Pasu-pasu muna i, asima roha ni Tuhanta dipasaut ma i.

Tinampul bulung sabi, lompan ni pangula

Sahat ma pasu-pasu ni lehon muna, Horas ma hamu hula hula.

Horas jala gabe ma hita sude.


Parhata ni parboru :

Dihamu parboruon nami, ala naung sun ulaonta, asa diingot angka situan natorop di ulaonta i, ba pasahat hamu ma ingot-ingot.

(Somalna, gumodang sian paranak, dung ditaruhon suruan ni Paranak  tu horong  ni Parboru, laos margabung ma dohot ingot-ingot na sian parboru, Jala Parhata ni Parboru ma pasahathon tu sahalak Dongan Sahuta ni nadua bola pihak. Ingot-ingot na sian paranak dibagihon tu horong ni parboru, jala nasian parboru tu paranak, dung jolo adong hata pangantar sian dongan sahuta ni parboru).


Hata huhuasi ingot-ingot sian dongan sahuta ni Parboru :

Gabe ma hita jala horas. Parjolo ma tadok mauliate tu Amanta parasirohai, na mandongani hita di ulaon sadarion.

Ai nunga jumpang tali pasa, bahen ihot ni ogung oloan

Nungnga denggan marujung hata, jala masipaolo-oloan


Hamu hasuhuton nadua, godang dope siulaonta, jadi sai marsiamin-aminan ma hamu, songon lampak ni gaol, jala masitungkol-tungkolan songon suhat di robean. Taringot anak dohot boru i, sai marrongkap ma nasida, sai martomu ma nasida songon buhu tu ruas, jala tu hita saluhutna dohonongku ma :

Andoras ma tu andoris, tu andor ni purbatua

Rap horas ma hita rap torkis, di na mulak be hita tu jabunta.


(Dungi dipambagihon ma hepeng i, dung sun dibagi laos didok ma : Ingotingot = 3 x)

TANGIANG PANUTUP SIAN PARBORU

MARSIJALANGAN

Botima!!!!!!!




sumber :



Thanks for reading & sharing Sihaloho Sidapitu

0 komentar:

Post a Comment